Volver...

Ler estes días a prensa e quedar estupefacto é todo un. Comprobar con que convicción e entreguismo nos lanzan os medios a esa cerimonia da confusión chamada "mercados" é demasiado duro mesmo para un pobre katangueiro curtido en rúas de formigón. A última ocorrencia dos grandes partidos españois de retocar a anteriormente sacrosanta Constitución Española de cara a reducir e controlar o déficit das administracións públicas, todo en aras indisimuladas de tranquilizar a eses "mercados" é excesiva mesmo para un pobrísimo katanguista despistado e solitario coma min. Como dirían os nosos secuestrados veciños: "É de mais...que chatice!".

Porque vólvese a caer na mesma desgraza unha e outra vez. Porque esa medida ataca frontalmente as medidas políticas máis progresistas ao condicionar a xestión do público mediante cintos de protección de débeda. Como se ese fose o problema, o causante, desta incesante crise. De certo que, de termos controlado e evitado a altísima débeda PRIVADA, que é a que nos meteu neste problemiña cos "mercados", cunha medida semellante agora non estaríamos aquí. Porque aínda non se controla, mediante lei algunha, o reparto desorbitado de beneficios por parte dos executivos das máis grandes empresas e multinacionais. Porque, postos a cambiar cousiñas da Constitución, poderíamos falar dalguns dos seus títulos máis discutibles. E tod@s sabedes a que me refiro...

Postos a cambiar cousiñas, por que non recoñecer que este sistema neoliberal é un fracaso e pon en risco ao mundo e as persoas que o habitamos, sexa aquí, sexa alá???

Por que se siguen tendo en conta as opinións dunhas axencias que evidenciaron ao longo da súa existencia innumerables erros de vulto?

Por que Alemaña xira á esquerda e nós damos xa por sentado que gobernará Rajoy?

Por que nos asusta Christine Lagarde?

Eu estou co desplante do outro día no Parlamento. Hai veces que hai que deixalos sós, cos seus "mercados", co seu liberalismo, co seu...